top of page

لحظة صراحة
بينى وبين نفسى
بين أملى وبين يأسى
مشيت مشاوير
تعبت كتير
واتخدعت من أحلامى
اللى كانت بلا تفسير
لكن عمرى أبدا
مافقدت ثقتى فيك
كنت عارف انى مهما غرقت
مش هاهون عليك
وهاتمد ايدك الحنونة
ترفعنى وهافرح بيك
لحظة صراحة
خلت نفسى لأول مرة
تكون مرتاحة
انى بدون نعمتك
حاسس بفراغ محاوطنى
وفراغ جوايا
كل اما انجح يحبطنى
وارجع تانى لنفس البداية
واوصل تانى لنفس النهاية
لكن عزايا
انك واقف مستنينى
وانك دايما ساندنى
وواقف معايا
حتى لو كنت رافضك
مقاومك
ماتبقاش أب لو عاملتنى بنفس الطريقة
هيا دى الحقيقة
عمرك مااقتحمت حياتى
وكل ماكنت باروح بعيد
تقف تبكى وتقول لى انا هاستناك
مانا ياابنى اللى هنا
وانا اللى هناك
سامحنى يارب ماكنتش فاهم
عقلى كان محدود
واهم
انا جاى لك وانا نادم
مش متكل على برى فيا
أنا أصلا شرير وظالم
لكن مراحمك الأبدية
بسرعة راح تلمس ايديا
وماتعاملنيش على انى ميت
لأ تعاملنى على انى قايم
مانت اللى بضعفى ومرارى
وحدك ياربى انت اللى عالم
لحظة صراحة
تخلى نفسى كدة مرتاحة
وتقول لك بصوت مكسور
ايمته ياربى اشوف النور؟
انا محتاج لك
تشفى جراحى
وتقبلنى وترحمنى
رغم ما فيا من شرور

Your details were sent successfully!

bottom of page